سپين غر مومند پنځوس بستریز معالجوي او تدريسي روغتون چې د هېواد په ختيځ کې د سپين غر د لوړو زده کــړو مؤسسې تدريسـي روغتون دی، په (۱۳۸۸) هـ ش کال يې فعاليت پيل کړی دی او تر دې دمه يې په ګڼو روغتيايي برخو کې پراخ معالجوي او تدريسي فعاليتونه ترسره کړي دي.

هره خصوصي تحصيلي اداره چې د طب په برخه کې فعاليت پيلوي؛ اړتيا او اصولو ته په کتو لازمه ده د خپلو محصلينو د نظري زده کړو ترڅنګ، د هغوی عملي زده کړو ته هم پاملرنه وکړي او د مؤسسې د تدريسـي روغتون تر سرليک لاندې، يو ځانګړی روغتون ولري چې له نېکه مرغـه سپين غــــــر د لـــــــوړو زده کـــړو مؤسسې زده کړيــــــــــالان له پيله تدريسي روغتون لري.

 سپين غر مومند پنځوس بستريز معالجوي او تدريسـي روغتون کې اوسمهال د عمومي داخلې، عمومي جراحي، قلبي څانګې اړوند انجيوګرافي، انجيوپلاسټي او پيس ميکر، جلدي، عصبي جراحي، کوچنيانو جراحي، کوچنيانو، نسايي ولادي، غاښونو، سترګو، غوږ پزې او ستوني، انتاني، عقلي عصبي او هډوکو فعالې څانګې لري، چې د سيمې په کچه د مجربو متخصصو ډاکټرانو په درلودلو سره - د مجهزو طبي وسايلو پرمټ - د ګڼو ناروغيو غوره تشخيص او ډاډمنه درملنه کوي.

ياد روغتون له تېرو نږدې پنځلس (15) کالونو راهيسې، د اوږدې سابقې او نيک شهرت په درلودلو سره، د ولس په زړه او ذهن کې ځای لري چې د روغتون مؤسس، مشـرتابه او ټول کاري ټيم  د ولس د شته باور ساتلو ته ژمن دي، او د شونتيا تر بريده به  په بې پرې ډول، د معالجوي خدمتونو وړاندې کولو سربېره، خپلو محصلينو ته د عملي تدريس غوره چاپېريال او زمينه رامنځته کوي.